Þessa dagana er ég að undirbúa veislu eins og svo algengt er á þessum árstíma. Í fyrra stóðum við Inga í ströngu og vorum meðal annars með fleiri tugi af vodkahlaupsnuddum. Nú er öldin önnur og í þessari veislu verður sannarlega ekki bleytt upp í snuðunum með vodka. Að þessu sinni er það ekki afmælið mitt sem ég er að undirbúa heldur nafngift dótturinnar.
Að mörgu er að huga en svo heppin erum við að góðar ömmur og langamma leggja sannarlega sitt af mörkum við baksturinn.

Ætla að setja inn smá óskalista fyrir ykkur sem hafið hug á að gefa nafngiftargjöf

*Manduca burðarpoki http://pokadyr.123.is/page/19026/ eða peningur upp í hann. Þessi er efstur á listanum hjá okkur báðum, enda daman aðeins farin að síga í.

*Ferðarúm (eitthvað í þessum dúr) http://rumfatalagerinn.is/rl/vefverslun/?ew_877_cat_id=18233&ew_877_p_id=22626447&product_category_id=86459

*Hvað á ég að gefa barninu mínu að borða (bók)

*Draumalandið (bók, ekki eftir Andra Snæ heldur um svefn ungbarna)

*Vísnabókin (þessi klassíska)

*Skartgripur, armband eða hálsmen (jafnvel til að grafa nafnið í)

*Bleyjufata

*Föt í stærð 62, 2-4 mán, 3-6 mán, þar á meðal síðerma samfellur

*Hettuhandklæði

*Sænguverasett 70x100 (67x100)

*Rammi sem hægt er að grafa í stærð og þyngd

*Sætt barnaalbúm

*Einhverjar skemmtilegar myndir á veggi, t.d. sem hægt er að hengja upp með kennaratyggjói fyrir ofan skiptiborðið

*Inneign í barnavörubúð

*Peningar inn á framtíðarreikning (sem við ætlum að stofna fyrir hana þegar nafnið er komið)

Bara nokkrar hugmyndir fyrir ykkur sem eruð í þessum hugleiðingum :)

Hér má sjá litlu dömuna á leikteppinu í fyrsta skipti, við ætluðum reyndar að ná brosi en það tókst ekki í þetta skiptið.

Allt gott að frétta, mótmælin skiluðu árangri þrátt fyrir að við höfum ekki tekið þátt í þeim, höfum haft um annað að hugsa. Nóg að gera í blessuðum skólanum og svo þarf víst að kaupa skólabækur sem eru ekki gefins þetta árið.

Á sunnudagskvöldið vorum við boðin í mat til Ingu og Jóns í hangikjöt hvorki meira né minna. Mjög mikil sárabót fyrir einhvern sem fékk ekkert reykt um jólin. Krúttið var svo þæg hjá þeim skötuhjúum að ég er viss um að þau halda að það sé ekkert mál að eiga barn ;)

Í gær horfði svo öll fjölskyldan á United bursta WBA 5-0 og vorum við frekar sátt með þetta allt saman. Litla Styrmisdóttir kippti sér reyndar ekki mikið upp við þetta enda var hún alveg viss um að sínir menn myndu hafa þetta :)

Jæja nú er einhver orðin svangur, best að hlýða kallinu.

Au pair óskast. Ekki til að sinna barninu mínu, því tími ég ekki. Nei öllu heldur til að sinna heimilsstörfum, eins og þrifum, þvotti, eldamennsku og uppvaski. Hún mætti líka læra aðeins fyrir mig líka. Og launin, ja ánægjan af því að umgangast okkur ;)

Var að setja inn fréttir í vefdagbók og myndir á heimasíðu dótturinnar, njótið vel.

Þá er maður smátt og smátt að venjast nýja hlutverkinu. Það er krefjandi og skemmtilegt í senn og mikil ábyrgð. Okkur finnst foreldrahlutverkið mjög gefandi og hlökkum til hvers dags, hver kúkableyja er hin besta skemmtun :)
Litlan er orðin 2 vikna og hefur stækkað töluvert, hún er farin að taka betur eftir og grandskoðar á okkur andlitin. Við getum ekki beðið eftir að hún fari að brosa, fallegu brosin hennar hingað til eru víst bara vindverkir;)

Mér reynist afar erfitt að byrja í skólanum, nóg að gera við að sinna heimili og barni. Faðir minn bloggaði um kúkableyjur á dögunum en um var að ræða taubleyjur af mér. Ekki skil ég hvernig þau gömlu fóru að þessu, við eigum um 50 taubleyjur sem við notum á skiptiborðið og undir ælu en erum samt alltaf að þvo og strauja, merkilegt nokk.
Ég verð nú að grobba mig af því að ég stóð við stóru orðin og léttist um tíu kíló eftir jólin, geri aðrir betur ;) Þrjú eru svo farin í viðbót því bjúgurinn fer minnkandi. Það er þó af nægu að taka og efast ég um að ég bloggi frekar um holdarfar mitt. Ég ætti samt kannski að selja hugmyndina að megruninni til Hollywood.. Eignastu barn og misstu 10 kíló á einu bretti.

Takk innilega fyrir allar kveðjurnar, setti inn myndir á heimasíðuna hennar fyrir ykkur að skoða. Hér er líka eitt lítið myndband sem pabbinn tók á fyrsta degi :)

Litla dóttir okkar kom í heiminn þann 3. janúar klukkan 15:55. Hún var 4020 grömm og 52 cm. Hún var ekkert að flýta sér en fæðingin tók 50 klukkutíma. Við vorum svo bara að koma heim í dag þar sem ég missti svo mikið blóð að ég þurfti að liggja inni á sængurkvennadeild. Því hef ég lítið svarað í símann og við erum enn ekki tilbúin að fá gesti en vonandi fer þetta allt að koma. Set inn myndir á síðuna hennar við fyrsta tækifæri en hér er smá sýnishorn af fullkomnu litlu stelpunni okkar.

Hér er hún bara nokkra tíma gömul :)

Þessi mynd var tekin í dag, rétt fyrir heimferð. Hér er hún í fínu fötunum sem langamma Auður prjónaði, í fanginu á besta pabbanum.Það kom flestum á óvart að hún virðist ætla að vera ljóshærð :)

Neibbs, það er ekkert að gerast. Litla krílið hefur það alltof gott hjá mömmu sinni til að vera að hafa fyrir því að fæðast. Auk þess fer það ekki eftir duttlungum vina og ættingja sem fara úr landi heldur kemur bara þegar því hentar.
Mamman er orðin vel þreytt og alveg til í að fá krílið sitt, hver dagur sem líður framyfir settan dag er eins og vika. Nóg að gera samt við að svara símtölum og sms-um en allir eru orðnir spenntir eins og skiljanlegt er.

Við höfum haft það mjög gott um jólin, fengum góðar gjafir og dekrað hefur verið við okkur. Foreldrar mínir létu sig ekki muna um að hafa tvíréttað á aðfangadag og jóladag svo ég gæti líka fengið góðan mat sem var ágætis sárabót. Tengdó eru nú tekin við og ætla að töfra fram dýrindis gamlárs og nýjársmat.

Fór í mæðraskoðun í morgun og svo er mónítor í fyrramálið. Set inn fréttir á barnalandssíðuna eftir mónítorinn svo þið getið fylgst með. Eins og staðan er þá lítur allt út fyrir að barnið ætli sér að verða 2009 barn, skyldi bílprófið heilla?